Máttur matarins

Fæða sem forvörn

september 30, 2010 • 1:58 AM Comments Off

Tómatsalat með kóríander og cayenne pipar

Þetta salat er eitt af mínum uppáhalds. Upphaflega fann ég það í bók eftir Madhur Jaffrey, sem ég elda mikið úr, en með tíð og tíma hefur uppskriftin breyst lítillega eftir mínu höfði. Salatið passar fullkomlega með bragðsterkum indverskum pottréttum og er rosalega fljótlegt, hollt og einfalt. Allar fæðutegundirnar í salatinu hafa eiginleika sem vinna gegn krabbameini. Tómatarnir innihalda lycopene sem ég hef áður talað um hér á síðunni. Ferskt kóríander hefur eiginleika sem hjálpa líkamanum að losa sig við þungamálma. Það hefur einnig bólguhemjandi áhrif á líkamann auk þess að vera gott fyrir meltinguna. Að lokum langar mig að nefna það að ferskt kóríander hefur eiginleika sem jafna/stilla(e. regulate) NF-kB í líkamanum. NF-kB er prótein samstæða sem þjónar grundvallarhlutverki þegar líkaminn bregst við sýkingum og hefur einnig verið tengt við myndun krabbameins, þ.e. þegar um óeðlilega virkni NF-kb eða stillingu þess er að ræða (sjá nánar um þetta hér). Ég ætla hins vegar ekki að hætta mér dýpra ofan í þessi mjög svo flóknu fræði. Hér kemur uppskriftin að þessu skemmtilega salati.

Uppskriftin inniheldur eftirfarandi krabbameinshamlandi fæðutegundir:
Ávextir: sítrus ávextir
Grænmeti: tómatar, laukur
Krydd og kryddjurtir: ferskt kóríander, cayenne pipar

Uppskrift
fyrir 4-6 með mat

2 öskjur kirsuberjatómatar skornir í tvennt
2-3 msk. ferskt kóríander saxað
1 laukur smátt skorinn
1/2 tsk. salt
1/8 tsk. cayenne pipar
2 msk. sítrónusafi
1 msk. extra virgin ólífuolía

Blandið öllu saman í skál og berið fram með mat.

About these ads

Filed under: kóríander, laukur, Salöt, sítrus ávextir, tómatar, Uppáhalds, Uppskriftir, Vegan, , , , , , ,

september 27, 2010 • 2:05 PM Comments Off

Merkilegt TED talk um krabbameinsforvarnir

Mig langar að benda öllum áhugasömum á þetta frábæra TED talk. Hér fjallar Dr. William Li um fyrirbæri sem kallast angiogenesis eða æðanýmyndun. Í umfjöllun hans kemur fram að líkamar nánast allra hafa að geyma krabbameinsfrumuklasa, en til þess að þeir verði líkamanum hættulegir verður að eiga sér stað hin svokallaða æðanýmyndun. Æðanýmyndunin verður til þess að meinið nærist og getur haldið áfram að vaxa og þannig verða líkamanum skaðlegra. Dr. William Li fjallar hér um hvaða fæðutegundir hægt er að borða til þess að koma í veg fyrir æðanýmyndun og þannig myndun skaðlegra æxla í líkamanum.Þetta er virkilega merkilegur fyrirlestur sem ég mæli eindregið með að fólk horfi á og kynni sér í framhaldið þær rannsóknir sem William Li og hans samstarfsmenn standa að baki.

Hér er linkur inn á The Angiogenesis Foundation sem Dr. William Li er forseti yfir.

Eftirfarandi er listi yfir þær fæðutegundir sem Dr. William Li fjallar um í fyrirlestri sínum.

Filed under: Fæðutegundir, Myndskeið, Rannsóknir, , , , , , ,

september 21, 2010 • 3:12 PM Comments Off

Crazy Sexy Kris Carr

Fyrir sjö árum síðan greindist Kris Carr með krabbamein í bæði lifri og lungum. Þessi tegund krabbameins var lítið þekkt og afar óalgeng og voru læknarnir hennar því tvístíga um hvernig meðferðin ætti að fara fram, hvort að hún ætti að ganga í gegnum hefðbundna krabbameinsmeðferð eða hvort að best væri að bíða og láta meinið sjálft „taka fyrsta skrefið“.  Kris Carr var 31 árs gömul leikkona, módel og ljósmyndari og var að gera það nokkuð gott sem slík.

Kris tók á þessum tímapunkti upp upptökuvél og fór að taka upp mynd sem síðar varð að heimildarmyndinni Crazy Sexy Cancer. Myndin er að mínu mati frábær. Kris hefur ótrúlega útgeislun og mikla orku sem án efa gefur flestum áhorfendum innblástur. Hún ákvað strax að hún vildi ekki leyfa meininu að taka stjórn á hennar lífi með því að bíða eftir því að það færi að dreifa sér og ákvað því að taka sjálf fyrsta skrefið. Hún byrjaði að lesa sig til um allt sem tengdist hennar sjúkdómi og hvernig hægt væri að halda meinunum, eða the beauty marks eins og hún kallar þau, í skefjum. Hún breyttist í plöntuætu (e. Vegan) á einni nóttu og er nú orðin að mestu leyti hráfæðisæta einnig. Þær breytingar sem Kris gerði á lífstíl sínu hafa gert það að verkum að meinið hennar er algjörlega stabílt og hefur ekki dreift sér né stækkað síðastliðin 7 ár. Kris hefur gefið út bækurnar Crazy Sexy Cancer Tips og Crazy Sexy Cancer Survivor. Þetta eru fróðlegar bækur sem settar eru fram á einfaldan og skemmtilegan hátt fyrir venjulegt fólk. Í janúar nk. kemur svo út ný bók eftir Kris sem heitir Craxy Sexy Diet og fjallar um mataræði. Ég býð spennt eftir þeirri bók.

Kris heldur einnig úti skemmtilegri heimasíðu sem ég mæli eindregið með að þið kíkið á. Þar eru uppskriftir og allskyns fróðleikur um þessi mál.

Hér fjallar hún um The China Study sem ég fjallaði hér fyrir nokkrum vikum.

Filed under: Myndskeið, ,

september 15, 2010 • 9:14 AM Comments Off

Kjúklingapottréttur með mangó og döðlum

Uppskriftin inniheldur eftirfarandi krabbameinshamlandi fæðutegundir:

Ávextir: mangó, döðlur
Grænmeti: laukur
Krydd og kryddjurtir: hvítlaukur, cayenne pipar, garam masala (kóríander, kúmin, engifer, negull, lárviðarlauf,)

Uppskrift
fyrir 6

6 kjúklingabringur
2 msk ólífuolía
2 rauðlaukar niðurskornir
3 hvítlauksrif marðir
1 tsk cayenne pipar
1 tsk garam masala
1 tsk túrmerik
nýmalaður svartur pipar
1 tsk paprikukrydd
1 stórt þroskað mangó smátt skorið
1 dós kókosmjólk
1 bolli döðlur niðurskornar
1 tsk salt
2 msk ferskt kóríander saxað

Hitið olíuna í potti og steikið laukinn í 5-7 mínútur, bætið þá hvítlauknum út í og steikið áfram í 2-3 mínútur. Bætið því næst cayenne pipar, garam masala, túrmeriki, svörtum pipar, paprikukryddi og kjúklingi og steikið í 5 mínútur til viðbótar. Hrærið nokkuð stöðugt svo að ekkert festist við pottinn. Bætið svo mangói, kókosmjólk, döðlum og salti út í og hrærið. Látið suðuna koma upp og lokið pottinum. Látið malla í 30 mínútur. Takið lokið af pottinum  og bætið fersku kóríander út í og látið sjóða og þykkna í 10-15 mínútur til viðbótar. Berið fram með soðnum hrísgrjónum og naan brauði.

Filed under: döðlur, hvítlaukur, Karrý, kóríander, kúmin, Kjúklingur, laukur, mangó, negulnaglar, svartur pipar, túrmerik, Uppskriftir

september 4, 2010 • 5:55 AM 2

Ilmandi hollustu múslí

Við fjölskyldan vorum í byrjun ágúst í tvær vikur í heimsókn hjá bróður mínum sem er búsettur í New York borg. Fyrir manneskju eins og mig er engu líkt að koma inn í eldhús hjá þeim þar sem allt sem þar er er algjörlega í sérflokki hvað varðar gæði og ferskleika. Ég ákvað því að nýta tækifærið og móta nýja uppskrift að múslí, þar sem ég hafði allar mögulegar tegundir af hnetum, fræjum, þurrkuðum ávöxtum, hlynsírópi, agave sírópi, molasses sætuefni, hunangi svo ekki sé talað um kryddskápinn sem nær algjörlega nýjum víddum í gæðum. Jæja, nóg um það. Ég nýtti mér tækifærið. Afraksturinn ilmaði dásamlega.

Ég notaði kókosolíu í múslíið vegna þess að hún er bæði næringarrík, holl og góð. Hún styrkir einnig ónæmiskerfið sem er grundvallaratriði þegar kemur að forvörnum gegn sjúkdómum. Kókosolía er í föstu formi við stofuhita sem gerir hana góðan kost sem staðgengil smjörs í bakstri og matargerð sem þessari. Kókosolía hefur verið nokkuð umdeild í gegnum tíðina vegna þess að hún flokkast undir harða fitu þar sem hún er í föstu formi við stofuhita, en síðastliðin ár hafa rannsóknir sýnt hve jákvæð áhrif hún getur haft á líkamann. Það er að sjálfsögðu mikilvægt að kaupa gæða kókosolíu, eins og gildir um kaup á flestöllum mat. Hún fæst núorðið í flest öllum stórverslunum og heilsubúðum.

Hvað varðar hneturnar, fræin, þurrkuðu ávextina er líklega best að nota bara það sem til er í skápunum. Að sjálfsögðu eru hnetur og fræ misholl og tróna valhneturnar, hörfræin og chia fræin að sjálfsögðu á toppinum hvað hollustuna varðar. Ég mun klárlega prófa að setja goji ber í múslíið næst þegar ég geri það og ef til vill þurrkaðar fíkjur. Það myndi örugglega ekki klikka.

Uppskriftin inniheldur eftirfarandi krabbameinshamlandi fæðutegundir:

Ávextir: bláber
Kornmeti: haframjöl
Hnetur og fræ: Pekanhnetur

Uppskrift
gerir 10-11 bolla

4 1/2 bolli tröllahafrar
2 bollar niðurskornar möndlur
2 bollar niðurskornar pekanhnetur
1/2 bolli graskersfræ
1 bolli kókosolía – ein krukka
1/2 bolli agavesíróp
1/2 bolli maple síróp
1 msk. kanill
1 msk. vanilludropar
1/2 tsk. salt
1/2 bolli þurrkuð bláber
1/2 bolli rúsínur

Hitið ofninn upp í 160 gráður.

Blandið höfrum, möndlum, pekanhnetum og graskersfræjum saman í skál og leggið til hliðar. Bræðið kókosolíuna í potti, bætið agave sírópi, hlyn sírópi, kanil, vanilludropum og salti saman við og hrærið vel. Hellið úr pottinum yfir hafrablöndunum og blandið vel saman. Hellið í stórt eldfast mót og bakið í 30 mínútur. Takið út úr ofninum á 5 mínútna fresti og hrærið svo að blandan ristil öll jafnt. Látið kólna og bætið þá þurrkuðum ávöxtum saman við.

Filed under: haframjöl, kanill, Morgunmatur, pekanhnetur, Uppáhalds, Uppskriftir

Krabbamein

Á hverju ári greinast yfir 12 milljónir manns í heiminum með krabbamein og yfir 7 milljónir deyja vegna sjúkdómsins. Þrátt fyrir þessar ógnvekjandi tölur er krabbamein sjúkdómur sem margir telja að hægt sé að koma í veg fyrir með heilbrigðum lífstíl og réttu mataræði. World Cancer Research Fund hefur fullyrt að þriðja hvert krabbameinstilfelli tengist beint lélegu mataræði og þá yfirleitt skorti á fæðu úr plönturíkinu. Af þessu leiðir að óhollt mataræði er orðið gífurlega alvarlegt vandamál í heiminum og er brýnt að gripið sé inn í með uppfræðslu um nauðsyn holls mataræðis og heilbrigðra lifnaðarhátta. Fjöldi rannsókna sýna fram á mátt vissra fæðutegunda til þess að vinna gegn krabbameinsfrumum í líkamanum og þannig uppbyggingu lífshættulegra meina.

Staðreyndir

Ekkert lyf eða vítamín getur komið í stað heilsusamlegs mataræðis, sem er uppfullt af næringu úr jurtaríkinu, snautt af mettaðri fitu, ríkt af fjölómettuðum omega-3 fitusýrum og þar sem trefjaríkar kornvörur eru kjölfestan í þeim kolvetnum sem borðuð eru.
Tengsl milli krabbameins og bólgu eru mikil og margar tegundir æxla virðast helst myndast í bólguvef. Ýmsir bólgusjúkdómar auka því líkurnar á krabbameini í viðkomandi líffærum.
Mikil neysla á fæðu sem inniheldur óholla fitu, sykur og rautt kjöt samfara skorti á fæðu úr jurtaríkinu veldur bólguhvetjandi ástandi í líkamanum, sem á sama tíma eykur líkurnar á myndun krabbameins.
Omega-3 fitusýrur eru bólguhemjandi á meðan omega-6 fitusýrur eru bólguhvetjandi. Því er mikilvægt að jafnvægi sé milli þessara tveggja fitusýra í líkamanum.
Flestir innbyrða u.þ.b. 25 sinnum meira af omega-6 fitusýrum en omega-3 fitusýrum. Þetta stuðlar að bólguviðbrögðum í líkamanum sem getur aukið líkurnar á krabbameini.
Enginn getur útrýmt hættunni á því að þróa með sér krabbamein. En fólk getur hins vegar minnkað líkurnar talsvert með því að taka ábyrgð á eigin heilsu og gera þær lífstílsbreytingar sem nauðsynlegar eru.

Hafa samband

Ég heiti Þórunn Steinsdóttir og er lögfræðingur og einnig mikil áhugamanneskja um matargerð, holla lifnaðarhætti og forvarnir gegn krabbameini. Ég eyði miklum tíma í matargerð og að kynna mér mikilvægi heilbrigðs mataræðis sem forvörn gegn krabbameini. Hér mun ég miðla upplýsingum um efnið og uppskriftum sem innihalda fæðutegundir sem vinna gegn krabbameini.
Endilega sendið mér tölvupóst ef upp vakna spurningar um efni síðunnar á matturmatarins@gmail.com.

Sláið inn tölvupóstfang og ýtið á "gerast áskrifandi"

Join 359 other followers

Flokkar

Follow

Get every new post delivered to your Inbox.

Join 359 other followers

%d bloggers like this: