Þá er þessi yndislegi tími senn á enda. Ég ætla nú samt að ná að setja inn eina jólauppskrift til viðbótar. Við systkinin hittumst á annan í jólum og spiluðum en þar sem allar búðir voru lokaðar þurfti ég að vinna úr því sem til var í skápunum. Það var nú ekki margt og þá sérstaklega ekki margt sem hentaði sem möns yfir fimbulfambi. Ég átti þó möndlur og valhnetur og ákvað því að reyna að gera eitthvað gott úr þeim. Úr varð bara mjög skemmtilegt jólasnakk, jól í munnbita eins og einhver sagði. Það frábæra við þetta snakk er að það er svona nánast eins hollt og snakk getur orðið. Ég vildi óska þess að ég gæti sleppt hrásykrinum, en hann heldur þessu öllu saman, þannig að hann er ómissandi.
Valhnetur eru ríkar af omega 3 fitusýrum, sem koma sér vel eftir allt bólguhvetjandi reykta kjötið sem flestir borðuðu yfir hátíðirnar. Ég verð þó að viðurkenna að ég slapp einstaklega vel þetta árið, fékk hreint út sagt frábærar rjúpur á aðfangadagskvöld og svo verður kalkúnn á gamlárskvöld þannig að það var lítið um reykt og saltað á mínum bæjum. En aftur að valhnetunum. Rannsóknir sýna að valhnetur geta hægt á vexti krabbameins, bæði i brjósti og blöðruhálskirtli, og er það bólguhemjandi þátturinn sem hefur áhrif sem og þær tegundir af próteinum sem finnast í valhnetum auk annarra næringarefna. Í valhnetum er að finna efni sem kallast phytosterol, sem binst estrogen viðtökum og þannig hægir á myndun estrogentengdra meina.
Uppskriftin inniheldur eftirfarandi krabbameinshamlandi fæðutegundir:
Hnetur og fræ: valhnetur
Krydd: kardimommur, negull, cayenne pipar, kanill
Uppskrift
gerir rúmlega 2 bolla
2 msk. hrásykur
1 tsk. kókosolía eða góð ólífuolía
1 tsk. kanill
1/4 tsk. malaðar kardimommur
1/4 tsk. negull
1/4 tsk. cayenne pipar
1 tsk. maldon salt (minna ef notað er venjulegt salt)
1 bolli möndlur
1 bolli valhnetur
Blandið sykri og kryddum saman í skál. Bræðið kókosolíuna á pönnu og hellið kryddblöndunni saman við. Látið sykurinn bráðna saman við olíuna og bætið þá valhnetum og möndlum á pönnuna. Passið að hafa hitann ekki of háan, því þá brennur allt við. Ristið á pönnunni í nokkrar mínútur, eða þar til hneturnar hafa ristast léttilega og kryddin náð að setjast á þær. Látið kólna og berið fram.
Filed under: kanill, kardimommur, möndlur, negulnaglar, sætindi, Smáréttir, valhnetur, Vegan
