Um daginn fór ég á hráfæðisnámskeið sem Solla á Gló hélt þar sem Kate Magic kenndi listir sínar. Kate Magic er þekkt nafn í hráfæðisheiminum og hefur hún gefið út þrjár bækur auk þess að halda úti ferskri og skemmtilegri heimasíðu með allskyns fróðleik og uppskriftum. Námskeiðið var virkilega fræðandi og skemmtilegt. Þar lagði hún að sjálfsögðu mikla áherslu á jákvæða þætti þess að vera hráfæðisæta og kenndi okkur ýmis undirstöðuatriði. Einn af þeim réttum sem hún galdraði fram var chia búðingur. Chia er, eins og ég hef áður fjallað um, algjört ofurfæði, stútfullt af omega 3 fitusýrum og virkilega orkugefandi. Á námskeiðinu bjó hún til búðing sem innihélt möndlumjólk, epli og rúsínur (uppskrift á síðunni hennar finnst hér). Ég þarf hins vegar alltaf að hugsa um þá útgáfu sem líklegast er að þóknist lítilli tveggja ára draumarós og þess vegna ákvað ég að hafa möndlumjólk og hindber í vökvanum og strá síðan hemp fræjum yfir áður en ég bar búðinginn fram. Ég verð þó að viðurkenna að ungfrúin hafði ekki mikla lyst á búðingnum enda dálítið skrítinn undir tönn. Mig langaði þó að birta þessa uppskrift til þess að vekja athygli á þessum möguleika, sérstaklega fyrir þá sem eru að reyna að auka inntöku á omega 3, því þetta er algjör omega 3 bomba. Til þess að nýta afganginn af búðingnum hef ég bara laumað honum í smootie-ana okkar á morgnana og það finnst litlu fínt. Ég hvet fólk til þess að kíkja á síðuna hennar Kate Magic og prófa uppskriftirnar hennar. Þær eru margar hverjar mjög spennandi.
Auk þess að vera gífurlega rík af omega 3 innihalda chia fræ einnig efnin kaempferol, quercetin og myricetin sem rannsóknir hafa sýnt að geti unnið gegn krabbameini. Kaempferol er auk þess m.a. að finna í spergilkáli og te-i. Quercetin er að finna í grænmeti (í sérstaklega miklu mæli í rauðlauk) og ávöxtum en einnig í miklu mæli í grænu te-i. Myricetin er svo einnig að finna í ávöxtum, grænmeti og te-i (heimild).
Að lokum verð ég að segja ykkur frá því að á námskeiðinu fékk ég æðislegar fréttir. Solla lýsti því yfir að fljótlega myndi hún fara að selja hemp fræin/hjörtun í línunni sinni. Þetta gladdi mig mikið, enda er ég einstakur hemp hjörtu/fræja aðdáandi. Þá get ég líka farið að birta fleiri uppskriftir með hemp hjörtum án samviskubits, því nú hafið þið fljótlega öll greiðan aðgang að þessu einstaka ofurfæði.
Uppskriftin inniheldur eftirfarandi krabbameinshamlandi fæðutegundir:
Ávextir: hindber
Hnetur og fræ: chia fræ, möndlur, hemp fræ
Uppskrift
gerir 3-4 bolla af búðingi
1/2 bolli chia fræ
2 bollar möndlumjólk
1 bolli hindber (frosin eða fersk)
1 msk. hlynsíróp
2 msk. hemp fræ/hjörtu
Blandið öllu nema hemp fræjunum saman í skál og látið standa á borði, eða í ísskáp í að minnsta kosti 40 mínútur þannig að chia fræjin nái að bólgna vel út og mynda búðinginn. Berið fram með ávöxtum, t.d. niðurskornum banana, eða eitt og sér.
Like this:
Like Loading...
Filed under: chia fræ, hemp fræ, hindber, möndlur, hemp fræ, hindber, kaempferol, myricetin, ofurfæði, omega 3, orkugefandi, quercetin, rauðlaukur, spergilkál, Te
