Máttur matarins

Ég var svo heppin að eiga leið aftur til Vancouver núna í ágúst. Það var yndislegt að koma aftur til þessarar fallegu borgar og njóta hennar í þetta skiptið með allir fjölskyldunni. En það sem var líka æðislegt var að ég komst í uppáhaldsbókabúðina mína. Hún heitir Banyen Books and Sounds og er algjör draumastaður fyrir manneskju eins og mig. Þegar ég bjó í Vancouver var þetta staðurinn sem ég fór á þegar ég fékk alveg að ráða, eins og á afmælinu mínu. Ég gæti eytt dögum ef ekki vikum þarna inni. En nóg um það. Ástæðan fyrir því að ég fór að tala um Banyen er að ég keypti mér bók þar um Kínóa. Ég hef alltaf verið í hálfgerðu basli við að elda kínóa, hef prófað ýmislegt en einhvern vegin ekki komist upp á lagið með það. Mér finnst það fínt í súpur, ágætt í hafragraut svona til að bæta smá hnetukenndum keim í grautinn og einnig fínt í buff. En í bókinni eru hátt í tvöhundruð uppskriftir að réttum með kínóa sem eru hver öðrum girnilegri. Ég ákvað hins vegar að byrja á að gera eitthvað eftir mínu eigin höfði, eða næstum því.

Ég fékk hugmyndina að þessum rétti á stað sem við fórum á í Portland. Staðurinn heitir Yoga Pearl og er í Pearl District í Portland. Þetta er sem sagt jógastúdíó og veitingastaður. Við vorum svo hrifin af veitingastaðnum að við fórum á hann tvo daga í röð og fengum í bæði skiptin frábæran mat. Í fyrra skiptið fékk ég mér salat með kínóa, rauðrófum, spínati, rúsínum og dressingu. Mér fannst dressingin það eina sem var ekki fullkomið svo ég ákvað að gera annars konar dressingu núna. Svo ákvað ég að bæta við alfalfa spírum, taka rúsínurnar út og bæta inn þurrkuðum trönuberjum og hunangsrista valhnetur til að bæta við smá omega 3.

En það er nú varla hægt að halda lengra án þess að fjalla um ofureiginleika kínóa. Kínóa er fræ  sem kemur frá Suður Ameríku og var áður fyrr mikilvægur hluti af fæðu Inka. Það sem gerir Kínóa sérstakt er að það er einstaklega næringarríkt (sumir segja súperfæði), það er glúteinlaust og mjög próteinríkt. Það er einnig ríkt af magnesíumi, járni og fleiri steinefnum. Hvað krabbameinsforvarnir varðar þá mælir Keith Block í bókinni sinni Life Over Cancer sérstaklega með kínóa sem próteingjafa og þá sérstaklega vegna þess að þetta er mjög fitusnauður próteingjafi og auk þess næringarríkur og glúteinlaus.

En meira um það síðar og yfir í uppskriftina. Ég verð að viðurkenna að uppskriftin virðist vera mjög mikið vesen. En hún er það í rauninni ekki. Það þarf að sjóða rauðrófurnar og láta þær kólna, sjóða kínóað og láta það kólna líka og búa til dressinguna. Þetta er lítil vinna en tekur dálítinn tíma. Dressingin er mín útfærsla af mísódressingunni hennar Gwyneth. Bókin hennar Gwyneth er vægast sagt að gera mikla lukku þessa dagana.

Uppskriftin inniheldur eftirfarandi krabbameinshamlandi fæðutegundir:

Ávextir: trönuber,
Grænmeti: spínat, rauðrófur, rauðlaukur
Hnetur og fræ: kínóa, valhnetur
Baunir: sojabaunir (mísó)

Uppskrift
fyrir 4

1 bolli Kínóa
1 poki spínat
2 rauðrófur
1 bakki alfalfaspírur
½ bolli þurrkuð trönuber
1 bolli valhnetur
1 msk. hunang

Mísódressing

¼ rauðlaukur
3 msk. hvítt miso (fæst í heilsubúðum)
2 msk. ristuð sesamolía
2. msk. mirin
2 msk.  tamari sósa
2 msk. japanskt hrísgrjónaedik
2 msk. vatn
¼ bolli extra virgin ólífuolía
1 tsk. maldon salt
svartur pipar

Sjóðið rauðrófurnar í potti í 45 mínútur. Látið kólna, skrælið og skerið í bita.

Komið kínóa fyrir í potti með 2 bollum af vatni. Hitið þar til suðan kemur upp, lækkið þá hitann og látið sjóða í 10 mínútur. Slökkvið undir og látið standa í 4 mínútur. Opnið pottinn og hrærið með gaffli. Látið kólna.

Blandið öllum innihaldsefnum í dressingunni saman í matvinnsluvél.

Ristið valhneturnar á pönnu. Þegar búið er að rista valhneturnar í 2-3 mínútur, hellið þá hunaginu yfir og hrærið vel. Stráið örlitlu salti yfir og látið kólna.

Setjið spínat, alfalfa spírur, rauðrófur, kínóa, trönuber og valhnetur í skál og hellið dressingunni yfir. Berið fram.

Filed under: Bækur, kínóa, laukur, Salöt, sojabaunir, spínat, trönuber, Uppáhalds, valhnetur, Vegan