Þetta pasta”salat” er einstaklega einfalt og fljótlegt. Ég er mjög hrifin af pasta þegar það er framreitt svona. Pasta er í eðli sínu frekar þungt í maga og krefst talsverðrar orku til að melta. Þess vegna finnst mér betra að nota spelt pasta eða heilhveiti pasta, það er auðmeltanlegra og næringarmeira. Hér eru svo öll hin innihaldsefnin til þess fallin að gerir salatið léttara. Klettasalat er sérstaklega hollt og gott í maga sem og ferska basilið. Parmesanosturinn er svakalega góður á bragðið þannig að það var nú varla hægt að sleppa honum en fyrir plöntuætur sé ég fyrir mér að væri fínn kostur að blanda nutritional yeast saman við olíuna áður en henni er dreypt yfir salatið. Nutritional yeast, eða næringarger, er einstaklega hollt og sérstaklega ríkt af b-vítamínum. Það bragðast mjög svipað og parmesan ostur og hentar því vel í staðin fyrir ost í brauð, buff, pottrétti, salöt og til að strá yfir popp eins og vinkona mín í Vancouver gerir alltaf. Mæli með því að fólk prófi það.
Uppskriftin inniheldur eftirfarandi krabbameinshamlandi fæðutegundir:
Ávextir: trönuber/kirsuber
Grænmeti: klettasalat
Krydd: basil
Uppskrift
fyrir 4
400 gr. heilhveiti pennepasta
1 bolli parmesan gróft rifinn
1/2 bolli þurrkuð trönuber eða þurrkuð kirsuber
4 msk. ristaðar furhnetur
5 msk. sítrónuolía
1/2 poki klettasalat
1 bakki ferskt basil niðurskorið eða rifið
Salt og pipar eftir smekk
Sjóðið pastað í potti eftir leiðbeiningum. Hellið því í sigti og látið kalt vatn renna yfir það.
Blandið öllu nema olíunni saman í skál. Dreypið olíunni yfir salatið og hrærið vel saman við. Bætið við olíu ef þið teljið þess þurfa. Saltið og piprið eftir smekk. Skreytið með furuhnetum og þurrkuðum trönuberjum/kirsuberjum og berið fram.
Filed under: basil, kirsuber, klettasalat, trönuber
