október 13, 2012 • 10:41 AM Comments Off
Uppskriftin inniheldur eftirfarandi krabbameinshamlandi fæðutegundir:
Ávextir: banani, mangó
Grænmeti: gulrætur
Hnetur og fræ: sesamfræ (tahini), hampfræ (hamp prótein)
Krydd: engifer
2/3 bolli hrísmjólk með kókos
2/3 bolli gulrótasafi
1 tsk. tahini
smá bútur af engiferi
1 tsk. bee pollen
1 bolli frosið mangó
1 banani
1-2 msk. hemp prótein
Allt sett í blender og drukkið með bros á vör.
Filed under: bananar, Drykkir, engifer, gulrætur, mangó, Morgunmatur, sesamfræ, Vegan
maí 20, 2012 • 10:36 PM Comments Off
Í gær gerðum við okkur glaðan dag. Ég rölti út í Melabúð og keypti hlýra, ferskan aspas og nóg af brakandi fersku klettasalati í matinn. Ég er enginn sérstakur talsmaður þess að borða mikið grillaðan mat en stóðst ekki mátið í fallega veðrinu í gær. Ég held líka að svo lengi sem maður passar að maturinn brenni ekki á grillinu ætti þessi munaður að vera í lagi stöku sinni. En þessi umfjöllun er nokkuð góð um krabbameinsvaldandi áhrif grillaðs matar. Samkvæmt henni er mun betra að grilla fisk, og langbest að grilla grænmeti, og mikilvægt að hafa hitann ekki of háan og gott að halda áfram að pensla með marineringu eftir að grillun hefst.
Ég horfði fyrir tilviljun á þáttinn Grillað í sjónvarpinu í gær og þar var einn kokkanna að grilla fisk með misó marineringu. Þar sem ég er sérstakur aðdáandi misó varð ég að sjálfsögðu að prófa þetta strax. Ég notað svo afganginn af marineringunni yfir steikta aspasinn. Það kom mjög vel út.
En af því ég ætla ekki að skrifa mikinn fróðleik í þessari færslu þá ætla ég að pósta þessu myndskeiði sem er frábært. David Servan-Schreiber var algjörlega magnaður maður. Hann skrifaði bókina Anti Cancer sem ég hef svo oft fjallað um áður og breytti algjörlega mínu viðhorfi til matar og annarra umhverfisþátta. Hann lést í fyrra úr krabbameini en hafði þá lifað í um 20 ár eftir að greinast í annað skiptið með heilaæxli. Eftir að hann lést kom út bókin Not the Last Goodbye sem segir frá tímanum frá því að krabbameinið tók sig upp í þriðja skiptið og þar til hann lést. Hann er líklega besta dæmið um það að þrátt fyrir allt er stundum ekki hægt að stöðva mjög erfið og aggressív krabbamein. Hann fór alla leið í hefðbundnum meðferðum sem og óhefðbundnum. Ég er þó algjörlega sannfærð um það eftir að lesa bækurnar hans að hann hefði ekki lifið í öll þessi ár nema af því hann lagði sig fram á öllum vígstöðvum – þ.e. borðaði rétt, var í mikilli líkamsrækt og passaði að lágmarka snertingu sína við krabbameinsvaldandi efni og aðra umhverfiþætti sérstaklega vel.
En yfir í uppskriftina
Grillaður hlýri
500 gr. hlýri
Marinering:
3 msk. ljóst mísó
2 msk. tamari sósa eða soja sósa
2 msk. mirin
2 msk. hrísgrjónaedik
1 msk. hunang
1 msk. chili olía eða repjuolía
Öllu blandað saman í matvinnsluvél eða á annan hátt. Fisknum velt uppúr marineringunni og hann látinn marinerast í 1-2 klst.
Grillið í 3-4 mínútur á hvorri hlið, eða eftir þykkt bitanna.
Ferskur aspas
1 búnt ferskur aspas
2 msk. repjuolía eða önnur bragðlítil olía
1 msk. sesamolía
salt og pipar
Hitið olíuna á pönnu og steikið aspasinn í um 4 mínútur. Saltið og piprið og berið fram.
Salat
1 poki klettasalat
5 kirsuberjatómatar niðurskornir
1/4 rauðlaukur smátt skorinn
2-3 msk. þurrkuð trönuber
2-3 msk. ristaðar furuhnetur
Öllublandað saman í skál.
Dressing
4 msk. sýrður rjómi (10 %)
2-3 msk. dijon sinnep
1 msk. hunang
2 msk. lime safi
3 msk. góð extra virgin ólífuolía – ég notaði A deo1 msk. söxuð steinselja
salt og pipar
Blandið öllu saman í skál og hellið yfir salatið – eða hafið til hliðar fyrir hvern sem er til að hella yfir eftir vild.
Filed under: aspas, Bækur, Fiskur, klettasalat, laukur, Meðlæti, Myndskeið, Rannsóknir, Salöt, sítrus ávextir, Sósur, sesamfræ, steinselja, svartur pipar, trönuber, Uppáhalds, Anti Cancer, aspas, David Servan-Schreiber, grillaður fiskur, hlýri, miso marinering, Myndskeið, not the last goodbye
febrúar 27, 2012 • 10:48 PM Comments Off
Dóttir mín verður þriggja ára á morgun og við héldum uppá afmælið hennar núna um helgina. Mér finnst mjög gaman að baka og hef lengi reynt að baka sykurlausar, smjörlausar og allslausar kökur sem ekki hafa fengið sérlega góðar viðtökur. Ég hef því tekið þá stefnu að fara ákveðinn milliveg þegar kemur að bakstri og hafa að leiðarljósi að kökurnar séu næringarríkar þó svo að þær innihaldi eitthvað af þessu slæma líka.
Afmæliskakan var gulrótakaka sem er orðin algjör skyldubakstur fyrir afmæli hér. Hún inniheldur fullt fullt af næringarríkum fæðutegundum, s.s. gulrætur, valhnetur, ananas, döðlur og kókos, en kremið inniheldur það mikið af flórsykri að maður getur varla kallað kökuna í heild sinni holla. Ég er ekkert sérlega hrifin af flórsýkri en það virðist vera frekar erfitt að finna krem á kökur sem inniheldur engan flórsykur. Verkefni ársins er því að útfæra gott krem á gulrótaköku sem ekki inniheldur haf af flórsykri. Ef þið hafið einhverjar hugmyndir endilega sendir mér póst.
Auk þess gerði ég hnetusmjörskökur með súkkulaðibitum, heilsukókoskúlur með hamp fræjum og granólabita með aprikósum, jarðhnetum og trönuberjum. Þetta kom allt virkilega vel út og þetta gúmmilaði var allt mjög næringarríkt. Hér kemur uppskriftin að granólabitunum.
Uppskrift
passar í 20×20 kökuform
1 2/3 bolli tröllahafrar
1/2 bolli hrásykur
1/3 bolli byggflögur
1/2 tsk. salt
1/2 tsk. kanill
1 bolli þurrkaðar aprikósur niðurskornar
1 bolli þurrkuð trönuber
1 bolli blanda af jarðhnetum, sesamfræjum og hörfræjum
1/3 bolli hnetusmjör
1 tsk. vanilludropar
5 msk. kókosolía
1/4 bolli hunang
Hitið ofninn í 180 °C.
Blandið öllum innihaldsefnum vel saman í skál. Best er að nota hendurnar til að allt blandist vel saman. Komið fyrir í bökunarformi og bakið í 25-30 mínútur eða þar til granólað er farið að brúnast að ofan. Látið kólna í ísskáp og skerið í bita.
Svo var ég með fullt af ristuðum hnetum og fræjum sem komu vel út. Ég ákvað að tæma skápana mína og notaði öll fræin og hneturnar sem ég átti. Ég myndi segja að þetta hafi verið milli 4 og 5 bollar af hnetum og fræjum (blanda af möndlum, pekanhnetum, sesamfræjum, sólblómafræjum, hörfræjum og valhnetum). Ég blandaði þeim saman í eldföstu móti og hellti um það bil hálfum bolla af maple sírópi yfir og blandaði vel saman. Síðan setti ég um eina og hálf teskeið af garam masala saman við og rúmlega hálfa teskeið af salti. Þetta ristaði ég í ofni við 150 gráður í 10-15 mínútur eða þar til allt var búið að ristast. Mikilvægt er að muna að taka þetta út á nokkurra mínútna festi og hræra vel í til að það efsta brenni ekki og það neðsta ristist líka. Þegar þetta kom út úr ofninum þá lét ég allt kólna áður en ég blandaði súkkulaðidropum saman við. Ég notaði hvíta súkkulaðidropa í kremið fyrir gulrótakökuna þannig að afgangurinn á þeim fór í hentumixið. Undir venjulegum kringumstæðum hefði ég hins vegar keypt dökkt súkkulaði því það er langsamlega hollast. Endilega prófið. Þetta er frábært heilsuhnakk.
Filed under: aprikósur, bygg, döðlur, graskersfræ, haframjöl, hörfræ, hemp fræ, hnetur, kanill, möndlur, pekanhnetur, sætindi, sesamfræ, Uppáhalds, valhnetur, Vegan
apríl 21, 2011 • 4:36 AM Comments Off
Það var orðinn mjög alvarlegur múslískortur hér á heimilinu í gær og ég bara varð að gefa mér tíma til þess að mixa einn skammt af múslí. Lífrænt bíóbú jógúrt með kókos eða létt AB mjólk með heimatilbúnu múslí og ávöxtum er algjörlega fastur liður hjá mér á hverjum einasta degi. Í þeirri máltíð fæ ég mikið af þýðingarmiklum næringarefnum. Yfirleitt sker ég niður kíwi og borða með. Kiwi er algjör C-vítamínbomba og því góð fyrir stressaða lestrarhesta í próflestrinum. C-vítamín hefur auk þess mjög víðtæka virkni sem fræðimenn hafa mikið fjallað um í gegnum tíðina. Sigmundur Guðbjarnarson fjallaði um Linus Pauling og rannsóknir hans á blogginu sínu um daginn. Linus Pauling var einn helsti talsmaður aukinnar C-vítamínneyslu og gagnlegra eiginlega þess. Grein Sigmundar er að finna hér. Endilega kíkið á það.
En yfir í múslíið. Þetta múslí er frekar hefðbundið. Það er ekki ósvipað því múslí sem ég hef gert áður. Ég var að spá í að taka einhverjar æfingar og prófa að poppa amaranth í potti og bæta því svo út í múslíið. Það á víst að vera voða gott. En svo vildi ég ekki taka neina sénsa. Mig bara vantaði gott múslí og gott múslí varð það að vera.
Ég ákvað að nota þurrkuð epli. Ég verð að vísu að viðurkenna að þetta tókst ekki alveg eins vel upp og ég hafði hugsað mér. Ég var að vonast til þess að eplin yrðu stökk við það að ristast í ofninum, en þau urðu það bara alls ekki. Urðu eiginlega bara frekar seig. Auk þess varð ég nánast að standa við ofninn til að passa að þau myndu ekki brenna við. Af þessari ástæðu myndi ég mæla með því að bæta þurrkuðu eplunum bara út í eftir að búið er að rista múslíið, ef þið nennið ekki að standa við ofninn í hálftíma og fylgjast með múslíinu á meðan það ristast.
En það sem ég hafði ætlað mér að fjalla um í sambandi við múslíið var maple sírópið. Ég las frétt um daginn sem fjallaði um rannsókn sem sýndi bólguhamlandi og andoxandi áhrif maple síróps. Í greininni kom fram að í maple sírópi er efni sem líkist efnum sem einnig finnast í grænu te-i og bláberjum. Þessi efni eru talin geta unnið gegn krabbameini, hjartasjúkdómum og sykursýki. Í rannsókninni voru 54 efni greind sem eiga að hafa góð áhrif á heilsuna og 5 þeirra hafa ekki áður fundist í náttúrunni. Frétt um rannsóknina er að finna hér. Það er þó vert að minnast á það að mikilvægt er að kaupa gæða maple síróp. Ég myndi mæla með maple sírópi úr heilsuhillunni annars vegar eða hins vegar tók ég eftir því úti í Melabúð um daginn að þeir selja hágæða Kanadískt maple síróp sem ég man að var eitt af þeim allra bestu sem fengust þegar við vorum úti í Vancouver. Kanadamenn leggja mikið uppúr því að hafa maple sírópið sitt gott.
En nú ætla ég ekki að hafa þetta lengra. Gleðilega páska elsku lesendur og munið að stilla páskaeggsátinu í hóf. Í því samhengi langar mig að benda öllum á grein sem birtist í New York Times og fjallar um sykur. Þessi grein er algjör skyldulesning. Ég mun þó mjög líklega reyna að gefa mér tíma til að fara yfir helstu atriði greinarinnar hér á síðunni á næstunni. Greinina er að finna hér og einnig undir greinar.
Hér kemur svo uppskriftin að páskamúslíinu.
Uppskriftin inniheldur eftirfarandi krabbameinshamlandi fæðutegundir:
Ávextir: epli, trönuber
Krydd: kanil
Kornmeti: hafrar, hveitkím
Hnetur og fræ: heslihnetur, sesamfræ, sólblómafræ,
Uppskrift
gerir u.þ.b. 12 bolla
4 bollar tröllahafrar
1 bolli hveitikím
2 bollar heslihnetuflögur
1 bolli sólblómafræ
1 bolli sesamfræ
2 bollar söxuð þurrkuð epli
1 bolli bráðnuð kókosolía
2 msk. dökkur púðursykur
1/2 bolli maple síróp
1 msk. og 1 tsk. kanill
1/2 tsk. vanilluduft eða 1 tsk. vanilludropar
1/2-1 tsk. salt
1 bolli þurrkuð trönuber
Hitið ofninn í 160°C
Blandið höfrum, hveitikími, heslihnetum, sólblómafræjum, sesamfræjum og þurrkuðum eplum í skál. Bræðið kókosolíu í potti, bætið púðursykri , vanillu, salti, maple sírópi, og kanil saman við og hrærið vel. Blandið rólega saman við þurrefnin þar til allt hefur blandast vel saman. Komið fyrir í stórum eldföstum mótum og ristið í 30 mínútur í ofni. Takið út á 5-10 mínútna fresti og hrærið í. Látið kólna. Blandið þurrkuðu trönuberjunum saman við. Geymið í lofttæmdum umbúðum.
Filed under: epli, haframjöl, heslihnetur, hveitikím, kanill, kíwí, Morgunmatur, Rannsóknir, sólblómafræ, sesamfræ, trönuber, Vegan, maple síróp, múslí, Trönuber
mars 7, 2011 • 2:47 PM Comments Off
Uppskrift
fyrir 4 með mat
1 stór sæt kartafla skorin í þunnar sneiðar
3 msk. sesamolía (frá Rapunzel)
1 msk. næringarger
1 tsk. cumin
1 tsk. paprikukrydd
1/2 tsk. cayenne pipar
1 tsk. salt
Hitið ofninn upp í 180°C.
Blandið öllu saman í eldföstu móti og bakið í ofni 20-30 mínútur eða þar til kartöflurnar eru mjúkar í gegn. Getur verið gott að setja álpappír yfir formið fyrstu 15 mínúturnar og taka það svo af síðari 10-15 mínúturnar.
Filed under: chili, kartöflur, Kartöflur, kúmin, Meðlæti, sesamfræ, A-vítamínríkt, b-vítamínríkt, Beta Karótín, næringarger, Sætar franskar kartöflur
febrúar 7, 2011 • 7:51 AM Comments Off
Uppskriftin inniheldur eftirfarandi krabbameinshamlandi fæðutegundir:
Ávextir: sítrus ávextir
Kornmeti: hafrar, hveitikím
Hnetur og fræ: sesamfræ, graskersfræ
Uppskrift
gerir um 10 bolla
4 bollar tröllahafrar
1 bolli hveitikím
1 1/2 bolli kókosflögur
1/2 bolli sesamfræ
1/2 bolli graskersfræ
1/2 bolli kókosolía fljótandi
1/2 bolli hunang
rifinn börkur af 2 lífrænt ræktuðum appelsínum
1 tsk. himalaya salt
2 bollar þurrkaðir ávextir að eigin vali
Hitið ofninn upp í 150 gráður.
Blandið þurrefnunum í skál. Látið kókosolíuna bráðna í potti við lágan hita og bætið appelsínuberkinum saman við og loks hunangi og salti. Blandið vel saman við þurrefnin. Komið fyrir í ofnskúffu eða eldföstum mótum. Ristið 4 sinnum í 10 mínútur í senn. Takið út á milli og hrærið vel í svo að allt ristist jafnt. Látið kólna. Blandið þurrkuðum ávöxtum saman við og berið fram með jógúrti og ferskum ávöxtum. Geymist í loftþéttum umbúðum.
Filed under: graskersfræ, haframjöl, hveitikím, Morgunmatur, sítrus ávextir, sesamfræ, Vegan, hveitikím
febrúar 1, 2011 • 1:37 PM 1
Ég er einstaklega hrifin af núðluréttum og þessi heppnaðist sérstaklega vel. Það er einhvern vegin allt í þessum rétti sem gerir góðan núðlurétt, spergilkál, engifer, spínat, sesamfræ, sojasósa og tófú. Þetta eru allt fæðutegundir sem eru í miklu uppáhaldi hjá mér og vonandi hjá ykkur líka því þær eru sérstaklega hollar. Áður en ég held áfram með umfjöllunina um núðlurnar langar mig að skrifa nokkrar línur til að koma mér af stað í umhverfisspjallinu sem ég lofaði í nýársfærslunni. Ég er að spá í að skrifa eins og eina málgrein (sem verða örugglega alltaf þrjár) af og til um það hvernig við getur dregið úr mengun og þannig aukið gæði andrúmsloftsins í kringum okkur. Ég ætla hins vegar ekki að fjalla um það að kaupa íslenskt í þessari færslu því það tónar ekkert sérlega vel við þessa uppskrft, því miður. Það er hrikalegt hallæri í búðunum þessa dagana þegar kemur að íslensku grænmeti. Ég fór í Bónus í dag og það eina sem var íslenskt í grænmetisdeildinni voru gulrætur, án gríns. Enn hvað um það.
Það er oft erfitt að átta sig á því hvað við íslendingar getum gert til að draga úr mengun, því við erum jú svo heppin að nánast öll okkar raforka kemur frá endurnýjanlegum orkugjöfum. Þegar maður les sig til um þessi mál er rafmagnssparnaður yfirleitt eitthvað sem mikil áhersla er lögð á, því annarstaðar í heiminum er rafmagn oft á tíðum búið til með brennslu jarðefnaeldsneytis (kola), sem er mjög mengandi. En hvaðan kemur mengunin hér á landi? Hér kemur mynd sem gefur svar við því (heimild bls. 30).
Af myndinni sjáum við að iðnaðarferlar eru sá geiri sem mengar mest, þ.e. stórfyrirtækin. Ég ætla mér nú lítið að ræða um þau hér, því það er á annarra forræði að stjórna og takmarka útblástur stórfyrirtækjanna hér á landi. En af myndinni sýnist mér að almenningur geti aðallega haft áhrif á þrjá flokka, þ.e. samgöngur, landbúnað og úrgang. Þetta eru samtals 40% af útblæstri gróðurhúsalofttegunda og því nokkuð stór hluti. En hvernig höfum við áhrif? Hér eru nokkur atriði sem gætu komið ykkur af stað: Read the rest of this entry »
Filed under: chili, engifer, núðlur, sesamfræ, spínat, spergilkál, Tófú, Umhverfismál, Uppáhalds, Vegan
desember 21, 2010 • 2:30 AM Comments Off
Uppskriftin inniheldur eftirfarandi krabbameinshamlandi fæðutegundir:
Ávextir: döðlur, epli
Kornmeti: bygg, hafrar
Hnetur og fræ: hörfræ, sólblómafræ, sesamfræ
Krydd: kanill
Uppskrift
gerir um 9 bolla
3 bollar byggflögur
2 bollar tröllahafrar
3 msk. hörfræ + ½ bolli
15 stórar döðlur + 1 bolli niðurskornar
½ bolli eplamauk
3 msk. hlynsíróp
2 tsk. kanill
1 tsk. maldonsalt
100 gr. kókosolía
1 bolli sólblómafræ
1 bolli sesamfræ
Hitið ofninn upp í 160°C.
Maukið 15 döðlur, eplamauk, 3 msk. af hörfræjum, hlynsíróp, kanil og salt í matvinnsluvél og leggið til hliðar. Bræðið kókosolíuna í potti og blandið saman við maukið.
Blandið byggflögunum, tröllahöfrunum, ½ bolla af hörfræjum, sólblómafræjum og sesamfræjum í skál. Hellið maukinu yfir og blandið vel saman. Komið fyrir í ofnskúffu og ristið í 30 mínútur í ofni. Takið út og hrærið í á 10 mínútna fresti. Látið múslíið kólna og blandið þá niðurskornu döðlunum saman við. Berið fram með hreinu jógúrti eða ab mjólk og ferskum ávöxtum.
Filed under: bygg, döðlur, haframjöl, hörfræ, kanill, Morgunmatur, sólblómafræ, sesamfræ, Vegan
júní 23, 2010 • 6:04 PM Comments Off
Uppskriftin inniheldur eftirfarandi krabbameinshamlandi fæðutegundir:
Ávextir: sítrus ávextir
Grænmeti: aspas, paprika, gulrætur, laukur
Krydd og kryddjurtir: sesamfræ
Kornmeti: sojabaunir (bæði tófú og mísó (sojabaunamauk)
Uppskrift
fyrir 2
1 pakki þétt tófú
2 msk svört sesamfræ
2 msk ristuð sesamolía (eða venjuleg sesamolía)
1 msk ólífuolía
1/2 búnt ferskur aspas skorinn í tvennt
1 bolli gulrætur skornar í þunnar ræmur
4 vorlaukar skornir í þunnar ræmur
1/2 rauð paprika skorin í þunnar ræmur
Dressing
3 msk nýkreistur appelsínusafi
2 msk ljóst mísómauk/sojabaunamauk
1 msk sojasósa
Blandið innihaldsefnunum í dressinguna saman og leggið til hliðar.
Þerrið tófúið, skerið niður í ílanga bita og veltið upp úr sesamfræum. Hitið 1 msk af sesamolíu og 1 msk af ólífuolíu á pönnu og steikið tófúið við miðlungshita í 4-5 mínútur eða þar til það hefur brúnast vel. Takið tófúið af pönnunni og leggið til hliðar. Bætið 1 msk af sesamolíu á pönnuna og aspasnum og gulrótunum. Steikið í 3-4 mínútur við háan hita. Bætið því næst vorlauknum og paprikunni á pönnuna og steikið í 2-3 mínútur til viðbótar. Lækkið hitann og bætið tófúinu á pönnuna. Hellið því næst dressingunni yfir og hrærið vel. Berið fram með brúnum hrísgrjónum.
Filed under: aspas, gulrætur, laukur, paprika, sítrus ávextir, sesamfræ, sojabaunir, Tófú, Uppáhalds, Uppskriftir, Vegan, A-vítamínríkt, aspas, C-vítamínríkt, Mísó, Tófú, vegan
júní 13, 2010 • 8:32 PM Comments Off
Buff með brúnum hrísgrjónum, búlgur og byggi
Uppskriftin inniheldur eftirfarandi krabbameinshamlandi fæðutegundir:
Kornmeti: Brún hrísgrjón, bygg, sojabaunir
Grænmeti: rauðrófur
Hnetur: valhnetur, sesamfræ
Krydd: svartur pipar
Uppskrift
gerir 12-15 buff
1 bolli brún hrísgrjón
1/2 bolli búlgur
1/2 bolli bygg
300 gr mjúkt tófú
1/2 bolli rauðrófusoð (eða annað gott grænmetissoð)
1/2 tsk salt
1 msk ristuð sesamolía (eða venjuleg sesamolía)
2 bollar valhnetur saxaðar örsmátt/hakkaðar í matvinnsluvél
1 bolli gróf brauðmylsna
nýmalaður pipar
kókos
svört sesamfræ
kókosolía
Sjóðið brúnu hrísgrjónin, byggið og búlgurið saman í potti í samræmi við upplýsingar á pakka hrísgrjónanna. Minnkið vatnsmagnið um 1/2 bolla og setjið rauðrófusoð/grænmetissoð í staðinn. Þerrið tófuið lítillega og leggið í skál. Bætið salti, sesamolíu, valhnetum, brauðmylsnu og svörtum pipar út í og hrærið. Bætið því næst hrísgrjónablöndunni út í og hrærið vel saman við. Ef buffið er of blautt getur þurft að bæta örlítið meiri brauðmylsnu út í (fer yfirleitt eftir því hve mikill vökvi er í tófúinu). Hnoðið hvert buff lítillega í höndunum þegar það er mótað. Veltið upp úr blöndu af svörtum sesamfræjum og kókosmjöli og steikið á pönnu við miðlungshita í 4-5 mínútur á hverri hlið, eða þar til buffið hefur brúnast vel. Berið fram með gufusoðnu grænmeti og bragðmikilli hnetusósu.
Tilvalið að frysta þau buff sem ekki eru borðuð og hita upp í ofni þegar tækifæri gefst.
Bragðmikil hnetusósa
Uppskriftin inniheldur eftirfarandi krabbameinshamlandi fæðutegundir:
Grænmeti: laukur
Krydd: Hvítlaukur, engifer, sterkt madras karrý (kóríander fræ, fennel fræ, chili, sinnepsfræ, svartur pipar, fenugreek fræ, túrmerik, karrýlauf), cayenne pipar (chili)
Hnetur: jarðhnetur
Uppskrift
fyrir 4
1 rauðlaukur skorinn í þunnar ræmur
4 hvítlauksgeirar marðir
1 msk ólífuolía
1 bolli heitt vatn
1/2 tsk sterkt madras karrý
1 msk ferskt engifer, smátt saxað
1/2 bolli hágæða hnetusmjör
2-3 msk sojasósa
1/4 tsk cayenne pipar
Hitið olíuna á pönnu og steikið laukinn í 3-4 mínútur við miðlungshita. Bætið því næst hvítlauknum og karrýinu út í og hrærið saman við. Steikið í 2-3 mínútur til viðbótar. Lækkið hitann og bætið engiferi, hnetusmjöri og heitu vatni út í og hrærið saman við. Hrærið í nokkrar mínútur. Bætið þá sojasósu (2 msk) og cayenne pipar saman við og hrærið vel. Bætið vatni út í til að þynna sósuna ef þess þarf og bætið við afgangnum af sojasósunni eftir smekk. Látið malla í 2-3 mínútur. Berið fram með gufusoðnu grænmeti og buffi eins og sýnt er hér að ofan, eða með brúnum hrísgrjónum og gufusoðnu grænmeti.
Filed under: Buff, bygg, engifer, fennel, fenugreek, hnetur, hrísgrjón, hvítlaukur, karrýlauf, kóríander, laukur, Sósur, sesamfræ, svartar baunir, svartur pipar, svört sinnepsfræ, Tófú, túrmerik, Uppáhalds, Uppskriftir, valhnetur, Vegan, Buff, cayenne pipar, Gufusoðið grænmeti, Hnetusósa, Hnetusmjör, Jarðhnetur, Karrý, Kókos, Sesamfræ, Sojasósa, vegan
