Máttur matarins

Fæða sem forvörn

október 3, 2011 • 8:37 PM Comments Off

Matcha smoothie

Í þessum smoothie er ofur-ofur holla te-ið matcha, sem er tegund af grænu te-i sem á uppruna sinn í Japan. Þessi tegund af grænu te-i er talin sú allra hreinasta og er það skærgrænt á lit. Matcha hefur margfalt öflugri virkni en venjulegt grænt te. Í 1/2 tsk af matcha fæst um það bil sama virkni og í 8-10 bollum af venjulegu grænu te-i. Matcha er mjög fínmalað duft sem Japanir notuðu upprunalega sem hefðbundið te en hefur nú aukist neysla þess í allskyns annarri matargerð. Trufflur heilsugúrúanna er gjarnan velt uppúr matcha, matcha er bætt út í soba núðlur og ýmislegt annað og verður maturinn þá yfirleitt fallega grænn á lit.

Þegar ég bjó í Vancouver var ég vön að fá mér smoothie sem kallast Matcha monsoon og hugmyndin að þessum smoothie kemur frá honum. Ég er búin að reyna ýmsar tegundir en tókst ekki fyrr en nú að gera hann sérstaklega góðan. Svo ákvað ég fyrir um það bil viku síðan að hætta að drekka kaffi þar til ég er búin með mastersritgerðina mín og matcha te er því að gera góða hluti fyrir mig þessa dagana. Annað te sem ég er gjörsamlega fallin fyrir er svo Chai te. Ég hef alltaf kunnað vel að meta það en núna þegar ég átta mig á hve góð áhrif það hefur á einbeitinguna mína þá drekk ég það enn meira. Chai te inniheldur mikið af frábærum kryddum sem hafa mikil anti cancer áhrif. Þetta eru krydd eins og kardimommur, engifer, anís, svartur pipar og negull. Hreinlega lovely!


Uppskriftin inniheldur eftirfarandi krabbameinshamlandi fæðutegundir:

Ávextir: banani
Fræ: hörfræ/chia fræ
Te: matcha grænt te
Annað: ab-mjólk

Uppskrift
fyrir 1 

80 ml kókosmjólk (1/2 lítil dós)
1/2 bolli létt ab mjólk
1 tsk. matcha grænt te duft (eða venjulegt grænt te duft)
1/4 tsk. vanilluduft
2 tsk. hörfræ eða chia fræ
1 frosinn banani
klakar

Allt sett í blender og drukkið með bros á vör.

About these ads

Filed under: bananar, chia fræ, Drykkir, hörfræ, Jógúrt, matcha grænt te, Te, Uppáhalds, , , , , , ,

september 16, 2011 • 10:40 PM Comments Off

Linsubaunasúpa með appelsínum og engiferi

Uppskriftin inniheldur eftirfarandi krabbameinshamlandi fæðutegundir:

Ávextir: appelsínur
Grænmeti: rauðlaukur,
Krydd: karrý, kanill
Hnetur og fræ: valhnetur
Baunir: linsubaunir

Uppskrift
fyrir 4-6

1-2 msk. repjuolía
3 rauðlaukar – litlir
2 litlar appelsínur niðurskornar
2 tsk. hot madras karrý + svartur pipar
1,5 lítrar vatn
2 msk. grænmetiskraftur frá himneskri hollustu
2 tsk. maldon salt (minna ef maður notar venjulegt salt)
5 cm langur bútur af fersku engiferi, niðurskorið (eða eftir smekk
1 bolli rauðar linsubaunir
kanill á hnífsoddi

Grískt jógúrt
Hunangsristaðar valhnetur

Steikið laukinn upp úr repjuolíunni í 3-5 mínútur eða þar til hann hefur linast vel. Bætið þá karrýi, engiferi, kanil og appelsínum saman við og steikið í 1-2 mínútur. Hellið vatninu saman við og bætið krafti og salti saman við. Látið suðuna koma upp og lækkið undir. Látið malla í 25 mínútur. Maukið og berið fram með grísku jógúrti og hunangsristuðum valhnetum.

Filed under: Jógúrt, kanill, laukur, Rauðar linsubaunir, Rauðar linsubaunir, sítrus ávextir, Súpur, svartur pipar, túrmerik, Uppskriftir, valhnetur, , , , , ,

janúar 11, 2011 • 3:59 PM Comments Off

Hrásalöt

Síðustu daga hef ég verið að prófa mig áfram í hrásalatsgerð. Hvítkál og rauðkál eru bæði mjög holl, góð og ódýr. Þau fara vel í salöt, eru stökk og gróf, en vinna vel með ávöxtum og öðru sætu og safaríku. Ég gerði annars vegar hvítkálssalat með appelsínum og valhnetum og hins vegar rauðkálssalat með jarðaberjum, eplum og kasjúahnetum. Bæði salötin komu vel út, en hvítkálssalatið hafði þó að mínu mati vinninginn. Hvítkál er ekki alveg jafn rammt og rauðkálið og appelsínurnar passa einstaklega vel með því.

Hvítkál og rauðkál inniheldur mikið af C og K vítamíni auk þess að innihalda efnið sinigrin. Krabbameinshamlandi áhrif þessa efnis hefur vakið athygli fræðimanna sem telja það umbreytast í efni sem kallast glucosinolates sem talið er að geti unnið gegn krabbameini, og þá sér í lagi í maga og ristli. Sama er að segja um aðrar fæðutegundir sem falla undir flokk brassica grænmetis, s.s. rósakál, rófur, grænkál, spergilkál og blómkál. [sjá nánar: heimild]

Hrásalat með hvítkáli, appelsínum og valhnetum

Uppskriftin inniheldur eftirfarandi krabbameinshamlandi fæðutegundir:
Ávextir: sítrus ávextir
Grænmeti: hvítkál, rauðlaukur
Hnetur: valhnetur
Krydd: sinnep
Annað: jógúrt

Uppskrift
fyrir 4 með mat

1/2 hvítkálshaus niðurskorinn í þunnar ræmur
1 bolli valhnetur
2 appelsínur niðurskornar

Dressing:
200 gr. grískt jógúrt
1 tsk. safi úr límónu
1 msk. hunangs dijon sinnep
1 msk. maukaður rauðlaukur (eða rifinn á rifjárni)
1 tsk. agave síróp
salt og pipar

Blandið niðurskorna hvítkálinu, valhnetunum og appelsínunum saman í skál. Blandið öllum innihaldsefnum í dressinguna saman og hellið yfir salatið. Blandið öllu saman og berið fram. Read the rest of this entry »

Filed under: epli, jarðaber, Jógúrt, kasjúahnetur, kál, laukur, Meðlæti, Salöt, sítrus ávextir, valhnetur, , , , ,

janúar 7, 2011 • 3:01 AM Comments Off

Nýársfærsla

Ég hef aðeins verið að veigra mér við það að setjast niður og skrifa þessa færslu. Einfaldlega vegna þess að það ár sem við vorum að kveðja var einstaklega viðburðarríkt og stefnumarkandi fyrir mitt líf. Það má eiginlega segja að árið 2010 hafi verið ár áhugamálanna hjá mér. Ég fann mér svo ótrúlega mörg áhugamál sem ég er einstaklega þakklát fyrir að geta stundað. Ég ákvað í mars að opna þessa síðu í kringum stærsta áhugamálið og miðla þeirri þekkingu sem ég afla mér um áhrifamátt mataræðis á vöxt og myndun krabbameins í líkamanum til þeirra sem áhuga hafa á efninu. Áhugi fólk á þessu efni virðist vera að aukast mikið og ég finn fyrir aukinni trú fólks á áhrif heilbrigðs mataræðis á heilsu þess og andlega líðan. Read the rest of this entry »

Filed under: avokadó, bananar, Bækur, chia fræ, Fæðutegundir, Jógúrt, kíwí, Morgunmatur, Rannsóknir, sítrus ávextir, sojabaunir, Tófú, , , , , , , , , , , , , , , , , ,

október 18, 2010 • 3:08 AM 2

Orkusmoothie

Þessa dagana er ég að prófa mig áfram á morgnana í smoothy gerð. Ég hef verið að reyna að finna íslenskt orð yfir smoothy en mér hefur ekki dottið neitt í hug. Ég fletti því upp í tölvuorðabókinni minni og þá kom upp þýðingin “stimamjúkur”. Það er nú líklega ekki verri þýðing en hver önnur en mér finnst það eitthvað óþjált. En sem sagt, minn stimamjúki drykkur í morgun samanstóð af geisilega hollum og næringarríkum fæðutegundum sem allir ættu að reyna að koma inn í sitt mataræði á einn eða annan hátt.

Avokadó og spínat eru grunnurinn að súperhollustunni í þessum drykk. Avókadó er ein af þeim fæðutegundum sem kallað hefur verið superfood og t.d. David Wolfe fjallar mikið um í bókunum sínum. Avókadó er uppfullt af hollri fitu auk þess að vera ríkt af fólísýru, K-vítamíni, trefjum og fleiri nauðsynlegum næringarefnum. Spínat er að sama skapi líka algjört súperfæði (sjá nánar hér).

Hvað varðar jógúrtið þá er á bls 101 í bókinni Bragð í baráttunni fjallað um krabbameinshamlandi áhrif jógúrts og kemur eftirfarandi fram:

,,Dagleg neysla matar sem inniheldur meltingargerla er auðveld og áhrifarík aðferð til að viðhalda háu gildi mjólkurbaktería í ristlinum og fyrirbyggja þannig þróun krabbameins”.

Uppskriftin inniheldur eftirfarandi krabbameinshamlandi fæðutegundir:

Ávextir: banani, avókadó, goji ber, sítrus ávextir
Grænmeti: spínat
Fræ og kornmeti: chia fræ, hafrar
Jógúrt

Uppskrift

fyrir 2 fullorðna og eina litla 19 mánaða orkubombu

1 dós lífrænt ræktað kókosjógúrt frá Bíóbú
1 bolli haframjólk
1 lítið avókadó
1 banani
1 lúka spínat
10 goji ber
1 msk chia fræ
safi úr hálfu lime
1 tsk. agavesíróp (má sleppa)
5-6 klakar

Allt sett í blandara og hrært þar til drykkurinn er orðinn stimamjúkur. Hellt í glas og drukkið með bros á vör.

Filed under: bananar, chia fræ, Drykkir, goji ber, haframjöl, Jógúrt, Morgunmatur, sítrus ávextir, spínat, Uppáhalds, Uppskriftir, , , , , , ,

Krabbamein

Á hverju ári greinast yfir 12 milljónir manns í heiminum með krabbamein og yfir 7 milljónir deyja vegna sjúkdómsins. Þrátt fyrir þessar ógnvekjandi tölur er krabbamein sjúkdómur sem margir telja að hægt sé að koma í veg fyrir með heilbrigðum lífstíl og réttu mataræði. World Cancer Research Fund hefur fullyrt að þriðja hvert krabbameinstilfelli tengist beint lélegu mataræði og þá yfirleitt skorti á fæðu úr plönturíkinu. Af þessu leiðir að óhollt mataræði er orðið gífurlega alvarlegt vandamál í heiminum og er brýnt að gripið sé inn í með uppfræðslu um nauðsyn holls mataræðis og heilbrigðra lifnaðarhátta. Fjöldi rannsókna sýna fram á mátt vissra fæðutegunda til þess að vinna gegn krabbameinsfrumum í líkamanum og þannig uppbyggingu lífshættulegra meina.

Staðreyndir

Ekkert lyf eða vítamín getur komið í stað heilsusamlegs mataræðis, sem er uppfullt af næringu úr jurtaríkinu, snautt af mettaðri fitu, ríkt af fjölómettuðum omega-3 fitusýrum og þar sem trefjaríkar kornvörur eru kjölfestan í þeim kolvetnum sem borðuð eru.
Tengsl milli krabbameins og bólgu eru mikil og margar tegundir æxla virðast helst myndast í bólguvef. Ýmsir bólgusjúkdómar auka því líkurnar á krabbameini í viðkomandi líffærum.
Mikil neysla á fæðu sem inniheldur óholla fitu, sykur og rautt kjöt samfara skorti á fæðu úr jurtaríkinu veldur bólguhvetjandi ástandi í líkamanum, sem á sama tíma eykur líkurnar á myndun krabbameins.
Omega-3 fitusýrur eru bólguhemjandi á meðan omega-6 fitusýrur eru bólguhvetjandi. Því er mikilvægt að jafnvægi sé milli þessara tveggja fitusýra í líkamanum.
Flestir innbyrða u.þ.b. 25 sinnum meira af omega-6 fitusýrum en omega-3 fitusýrum. Þetta stuðlar að bólguviðbrögðum í líkamanum sem getur aukið líkurnar á krabbameini.
Enginn getur útrýmt hættunni á því að þróa með sér krabbamein. En fólk getur hins vegar minnkað líkurnar talsvert með því að taka ábyrgð á eigin heilsu og gera þær lífstílsbreytingar sem nauðsynlegar eru.

Hafa samband

Ég heiti Þórunn Steinsdóttir og er lögfræðingur og einnig mikil áhugamanneskja um matargerð, holla lifnaðarhætti og forvarnir gegn krabbameini. Ég eyði miklum tíma í matargerð og að kynna mér mikilvægi heilbrigðs mataræðis sem forvörn gegn krabbameini. Hér mun ég miðla upplýsingum um efnið og uppskriftum sem innihalda fæðutegundir sem vinna gegn krabbameini.
Endilega sendið mér tölvupóst ef upp vakna spurningar um efni síðunnar á matturmatarins@gmail.com.

Sláið inn tölvupóstfang og ýtið á "gerast áskrifandi"

Join 359 other followers

Flokkar

Follow

Get every new post delivered to your Inbox.

Join 359 other followers

%d bloggers like this: