Myndskeið | Máttur matarins

maí 20, 2012 • 10:36 PM Comments Off

Grillaður hlýri með ferskum aspas og salati

Í gær gerðum við okkur glaðan dag. Ég rölti út í Melabúð og keypti hlýra, ferskan aspas og nóg af brakandi fersku klettasalati í matinn. Ég er enginn sérstakur talsmaður þess að borða mikið grillaðan mat en stóðst ekki mátið í fallega veðrinu í gær. Ég held líka að svo lengi sem maður passar að maturinn brenni ekki á grillinu ætti þessi munaður að vera í lagi stöku sinni. En þessi umfjöllun er nokkuð góð um krabbameinsvaldandi áhrif grillaðs matar. Samkvæmt henni er mun betra að grilla fisk, og langbest að grilla grænmeti, og mikilvægt að hafa hitann ekki of háan og gott að halda áfram að pensla með marineringu eftir að grillun hefst.

Ég horfði fyrir tilviljun á þáttinn Grillað í sjónvarpinu í gær og þar var einn kokkanna að grilla fisk með misó marineringu. Þar sem ég er sérstakur aðdáandi misó varð ég að sjálfsögðu að prófa þetta strax. Ég notað svo afganginn af marineringunni yfir steikta aspasinn. Það kom mjög vel út.

En af því ég ætla ekki að skrifa mikinn fróðleik í þessari færslu þá ætla ég að pósta þessu myndskeiði sem er frábært. David Servan-Schreiber var algjörlega magnaður maður. Hann skrifaði bókina Anti Cancer sem ég hef svo oft fjallað um áður og breytti algjörlega mínu viðhorfi til matar og annarra umhverfisþátta. Hann lést í fyrra úr krabbameini en hafði þá lifað í um 20 ár eftir að greinast í annað skiptið með heilaæxli. Eftir að hann lést kom út bókin Not the Last Goodbye sem segir frá tímanum frá því að krabbameinið tók sig upp í þriðja skiptið og þar til hann lést. Hann er líklega besta dæmið um það að þrátt fyrir allt er stundum ekki hægt að stöðva mjög erfið og aggressív krabbamein. Hann fór alla leið í hefðbundnum meðferðum sem og óhefðbundnum. Ég er þó algjörlega sannfærð um það eftir að lesa bækurnar hans að hann hefði ekki lifið í öll þessi ár nema af því hann lagði sig fram á öllum vígstöðvum – þ.e. borðaði rétt, var í mikilli líkamsrækt og passaði að lágmarka snertingu sína við krabbameinsvaldandi efni og aðra umhverfiþætti sérstaklega vel.

En yfir í uppskriftina

Grillaður hlýri

500 gr. hlýri

Marinering:

3 msk. ljóst mísó
2 msk. tamari sósa eða soja sósa
2 msk. mirin
2 msk. hrísgrjónaedik
1 msk. hunang
1 msk. chili olía eða repjuolía

Öllu blandað saman í matvinnsluvél eða á annan hátt. Fisknum velt uppúr marineringunni og hann látinn marinerast í 1-2 klst.

Grillið í 3-4 mínútur á hvorri hlið, eða eftir þykkt bitanna.

Ferskur aspas

1 búnt ferskur aspas
2 msk. repjuolía eða önnur bragðlítil olía
1 msk. sesamolía
salt og pipar

Hitið olíuna á pönnu og steikið aspasinn í um 4 mínútur. Saltið og piprið og berið fram.

Salat

1 poki klettasalat
5 kirsuberjatómatar niðurskornir
1/4 rauðlaukur smátt skorinn
2-3 msk. þurrkuð trönuber
2-3 msk. ristaðar furuhnetur

Öllublandað saman í skál.

Dressing
4 msk. sýrður rjómi (10 %)
2-3 msk. dijon sinnep
1 msk. hunang
2 msk. lime safi
3 msk. góð extra virgin ólífuolía – ég notaði A deo1 msk. söxuð steinselja
salt og pipar

Blandið öllu saman í skál og hellið yfir salatið – eða hafið til hliðar fyrir hvern sem er til að hella yfir eftir vild.

About these ads

Filed under: aspas, Bækur, Fiskur, klettasalat, laukur, Meðlæti, Myndskeið, Rannsóknir, Salöt, sítrus ávextir, Sósur, sesamfræ, steinselja, svartur pipar, trönuber, Uppáhalds, Anti Cancer, aspas, David Servan-Schreiber, grillaður fiskur, hlýri, miso marinering, Myndskeið, not the last goodbye

mars 19, 2012 • 11:59 PM Comments Off

Donald Abrams

Fyrir mig var ótrúlegt að horfa á þetta myndskeið. Það má eiginlega segja að þetta myndskeið dragi saman allt sem ég hef nokkurn tíman fjallað um á þessari síðu og svo miklu meira.

Það kemur mjög sjaldan fyrir að ég horfi á myndskeið eða lesi bók sem ég er alveg fullkomlega sammála að öllu leyti. Það er yfirleitt þannig að manni finnst bækurnar annað hvort ganga of langt eða kannski ekki alveg nógu langt, þær mæla með of mikið af þessu eða hinu sem maður sjálfur myndi kannski ekki gera að öllu leyti.

Donald Abrams er yfirkrabbameinslæknir á San Francisco General spítalanum í San Francisco. Hann er fræðimaður á Háskólanum í Kaliforníu, San Francisco (UCSF) og lærði hjá Andrew Weil í háskólanum í Arizona þau fræði sem hann kennir þar og kallast Integrative medicine. Integrative medicine er hvorki hefðbundnar né óhefðbundnar lækningar heldur samblanda af hvoru tveggja. Í framhaldinu stofnaði Donald Abrams stofu þar sem hann tekur við sjúklingum og meðhöndlar þá á þennan hátt.

Það gerir mig sérstaklega glaða að finna myndskeið eins og þetta og ég mæli því eindregið með því að allir taki sér tíma til að horfa á þetta einstaklega fræðandi myndskeið. Góða skemmtun og lifið vel!

Filed under: Myndskeið, Donal Abrams

mars 10, 2011 • 6:40 AM Comments Off

Fyrirlestur Dean Ornish hjá MD Anderson Cancer Center

Mig langar að benda öllum áhugasömum á þennan hreint frábæra fyrirlestur Dean Ornish hjá MD Anderson Cancer Center. Þetta er einhver besti fyrirlestur sem ég hef séð um mikilvægi heilbrigðs lífstíls á líkamslegt og andlegt heilbrigði. Ég ætlaði mér að lista upp helstu atriðin sem fram komu en hætti við vegna þess að fyrirlesturinn er í raun allur merkilegur. Mæli eindregið með því að fólk gefi sér tíma í að horfa á hann.

Fyrirlesturinn er aðgengilegur HÉR.

Filed under: Greinar, Myndskeið, Rannsóknir, Umhverfismál, Dean Ornish, MD Anderson Cancer Center

nóvember 9, 2010 • 6:23 AM Comments Off

Ýmislegt fróðlegt

Af því ég hef svo lítinn tíma þessa dagana hef ég ákveðið að setja inn eina færslu sem fjallar um þær fréttir og greinar sem ég hef verið að lesa upp á síðkastið. Ég er búin að byrja á svo mörgum færslum sem ég hef ekki náð að klára að ég ákvað að sjóða þær bara allar saman og láta vaða.

Fyrst langar mig að fjalla um alveg hreint frábæra grein sem ég var rétt í þessu að lesa. Ég er áskrifandi að greinum Mark Hyman, MD., á Huffington Post og eru greinarnar hans oftar en ekki mjög athyglisverðar. Greinin sem ég fékk í dag heitir Cancer Research: New Science on How to Prevent and Treat Cancer From TEDMED 2010. Ég mæli eindregið með því að þið lesið greinina og kynnið ykkur innihald hennar. Þau atriði sem mér fannst hvað merkilegust í greininni eru eftirfarandi: Read the rest of this entry »

Filed under: Greinar, Morgunmatur, Myndskeið, Rannsóknir, Uppskriftir

október 14, 2010 • 3:30 PM Comments Off

Michael Pollan

Í tilefni af því að búið er að íslenska bók Michael Pollan, Food Rules, eða Mataræði ákvað ég að skrifa nokkur orð um þennan merkilega mann. Michael Pollan er fjölmiðlafræðiprófessor við Berkley háskóla í Bandaríkjunum. Hann hefur skrifað 6 bækur og eru flestar þeirra á einhvern hátt um mat, mataræði, landbúnað eða umhverfi nútímans. Hann hefur notið aukinna vinsælda síðastliðin ár og þá sérstaklega eftir útgáfu bókarinnar The Omnivore’s Dilemma sem kom út árið 2006 og var kjörin ein af 10 bestu bókum ársins bæði af New York Times og Washington Post auk þess að hljóta fjölda verðlauna. Aðrar bækur sem Pollan hefur skrifað eru In Defense of Food sem kom út árið 2008, The Botany of Desire sem kom út árið 2001, A place of My Own sem kom út árið 1997 og Second Nature sem kom út árið 1991. Ég er svona næstum því búin að lesa allar bækurnar hans sem fjalla um mat og myndi mæla með því að allir læsu Food Rules þar sem hún er ótrúlega vel fram sett og aðgengileg. Hinar bækurnar eru frekar fræðilegar en virkilega góðar og vel skrifaðar. Gerð hefur verið mynd eftir The Botany of Desire sem ég er líka búin að sjá og ég myndi frekar mæla með því að fólk horfi á hana heldur en að lesa bókina í heild sinni, nema fólk hafi sérstakan áhuga á sögu epla, kartafla, maríjuana plöntunnar og túlípana. Myndin er mjög vel gerð og ótrúlega áhugaverð. Read the rest of this entry »

Filed under: Bækur, Myndskeið, Food Rules, In defense of food, Mataræði, Michael Pollan, The Botany of Desire, The Omnivore's dilemma

september 27, 2010 • 2:05 PM Comments Off

Merkilegt TED talk um krabbameinsforvarnir

Mig langar að benda öllum áhugasömum á þetta frábæra TED talk. Hér fjallar Dr. William Li um fyrirbæri sem kallast angiogenesis eða æðanýmyndun. Í umfjöllun hans kemur fram að líkamar nánast allra hafa að geyma krabbameinsfrumuklasa, en til þess að þeir verði líkamanum hættulegir verður að eiga sér stað hin svokallaða æðanýmyndun. Æðanýmyndunin verður til þess að meinið nærist og getur haldið áfram að vaxa og þannig verða líkamanum skaðlegra. Dr. William Li fjallar hér um hvaða fæðutegundir hægt er að borða til þess að koma í veg fyrir æðanýmyndun og þannig myndun skaðlegra æxla í líkamanum.Þetta er virkilega merkilegur fyrirlestur sem ég mæli eindregið með að fólk horfi á og kynni sér í framhaldið þær rannsóknir sem William Li og hans samstarfsmenn standa að baki.

Hér er linkur inn á The Angiogenesis Foundation sem Dr. William Li er forseti yfir.

Eftirfarandi er listi yfir þær fæðutegundir sem Dr. William Li fjallar um í fyrirlestri sínum.

Filed under: Fæðutegundir, Myndskeið, Rannsóknir, Angiogenesis, Æðanýmyndun, Dr. William Li, fæðutegundir gegn krabbameini, fæðutegundir sem svelta krabbamein, forvarnir gegn krabbameini, TED talk

september 21, 2010 • 3:12 PM Comments Off

Crazy Sexy Kris Carr

Fyrir sjö árum síðan greindist Kris Carr með krabbamein í bæði lifri og lungum. Þessi tegund krabbameins var lítið þekkt og afar óalgeng og voru læknarnir hennar því tvístíga um hvernig meðferðin ætti að fara fram, hvort að hún ætti að ganga í gegnum hefðbundna krabbameinsmeðferð eða hvort að best væri að bíða og láta meinið sjálft „taka fyrsta skrefið“. Kris Carr var 31 árs gömul leikkona, módel og ljósmyndari og var að gera það nokkuð gott sem slík.

Kris tók á þessum tímapunkti upp upptökuvél og fór að taka upp mynd sem síðar varð að heimildarmyndinni Crazy Sexy Cancer. Myndin er að mínu mati frábær. Kris hefur ótrúlega útgeislun og mikla orku sem án efa gefur flestum áhorfendum innblástur. Hún ákvað strax að hún vildi ekki leyfa meininu að taka stjórn á hennar lífi með því að bíða eftir því að það færi að dreifa sér og ákvað því að taka sjálf fyrsta skrefið. Hún byrjaði að lesa sig til um allt sem tengdist hennar sjúkdómi og hvernig hægt væri að halda meinunum, eða the beauty marks eins og hún kallar þau, í skefjum. Hún breyttist í plöntuætu (e. Vegan) á einni nóttu og er nú orðin að mestu leyti hráfæðisæta einnig. Þær breytingar sem Kris gerði á lífstíl sínu hafa gert það að verkum að meinið hennar er algjörlega stabílt og hefur ekki dreift sér né stækkað síðastliðin 7 ár. Kris hefur gefið út bækurnar Crazy Sexy Cancer Tips og Crazy Sexy Cancer Survivor. Þetta eru fróðlegar bækur sem settar eru fram á einfaldan og skemmtilegan hátt fyrir venjulegt fólk. Í janúar nk. kemur svo út ný bók eftir Kris sem heitir Craxy Sexy Diet og fjallar um mataræði. Ég býð spennt eftir þeirri bók.

Kris heldur einnig úti skemmtilegri heimasíðu sem ég mæli eindregið með að þið kíkið á. Þar eru uppskriftir og allskyns fróðleikur um þessi mál.

Hér fjallar hún um The China Study sem ég fjallaði hér fyrir nokkrum vikum.

Filed under: Myndskeið, Kris Carr, The China Study

maí 23, 2010 • 10:03 PM Comments Off

Dr. Oz fjallar um forvarnir gegn krabbameini

Dr. Oz er sjónvarpsþáttur vestan hafs þar sem fjallað er um heilbrigðismál og reynt er að fræða almenning um allskyns sjúkdóma og mikilvægi heilbrigðs lífstíls. Fyrir nokkrum dögum fjallaði Dr. Oz um forvarnir gegn krabbameini og voru þrír læknar honum til aðstoða í þættinum. Þetta voru þau David Servan-Schreiber, geðlæknir sem að sjálfur hefur tvisvar barist við heilaæxli og skrifaði bókina Anti Cancer, Elizabeth Tanzi, húðsjúkdómalæknir sem sjálf fékk sortuæxli og Dara Richardsson-Hero, lyflæknir sem sjálf fékk brjóstakrabbamein. Farið var um víðan völl og svarað spurningum áhorfenda. Eftirfarandi atriði komu fram í þættinum sem vert er að vekja athygli á.

-Hægt er að minnka líkurnar á því að fá krabbamein með því að borða mikið af grænmeti, feitum fiski, lágmarka sykurneyslu og drekka að minnsta kosti þrjá bolla af grænu tei á dag. Þetta hjálpar líkamanum að viðhalda vörnum sínum svo að krabbamein myndist ekki í líkamanum.

- Allar tegundir krabbameins eru háðar bólgu í viðkomandi líkamshluta til þess að geta stækkað og dreift sér. Þess vegna er mikilvægt að vinna gegn bólgumyndun í líkamanum með réttu mataræði, hreyfingu og með því að lágmarka streitu.

- D-vítamín er mjög mikilvæg forvörn gegn brjóstakrabbameini.

- Mikilvæg leið til þess að minnka bólgur í ristlinum er að minnka neyslu rauðs kjöts.

- Túrmerik er sérstaklega góð vörn gegn krabbameini í eggjastokkum. Rannsóknir hafa sýnt að túrmerik drepur krabbameinsfrumur í eggjastokkunum.

Fyrir þá sem hafa áhuga á að horfa á allan þáttinn þá er hann aðgengilegur hér.

Þáttturinn var athyglisverður og sýnd voru bæði myndir og myndskeið af krabbameinum í hinum ýmsu líkamspörtum. Einnig var útskýrt og sýnt á greinargóðan hátt hvernig húðkrabbamein verður til, lítur út og dreifir sér.

Mig langar að undirstrika það sem fram kom í þættinum varðandi d vítamín sem forvörn gegn krabbameini því að íslenskar konur eiga á hættu að skorta d vítamín vegna þess hve lítil sól er á Íslandi stærstan hluta ársins. Fyrir íslenskar konur, sem ekki eru mikið í sól, er mjög mikilvægt að taka annað hvort d vítamín (d3 vítamín) eða lýsi, sem er enn betri kostur því að lýsi inniheldur bæði d vítamín, a vítamín og omega 3 og vinnur því einnig gegn bólgum í líkamanum.