Þetta er alveg tilvalinn forréttur eða smáréttur þegar gesti ber að garði. Þetta er líklega eitthvað alveg nýtt fyrir flestum, beluga baunir og geitaostsblanda, og mun koma skemmtilega á óvart. Baunirnar eru sérlega hollar, trefjaríkar og prótínríkar.
Uppskriftin inniheldur eftirfarandi krabbameinshamlandi fæðutegundir:
Krydd: hvítlaukur
Baunir: beluga baunir
Uppskrift
gerir um 20 snittur
Baunirnar
¾ bolli beluga baunir, skolaðar
vatn
3 hvítlauksgeirar skornir í tvennt
½ tsk salt
Brauðið
1 súrdeigsbaguette brauð (eða venjulegt)
Extra virgin ólífuolía
Maldon salt
Geitaostsblandan
100 gr mjúkur geitaostur
smá mjólk
2 msk smátt skorið dill
Dill til að skreyta með
Hitið ofninn upp í 180 gráður.
Setjið baunirnar í pott og hellið vatni í pottinn þannig að það nái um 4 cm yfir baunirnar. Skerið tvö hvítlauksrif í tvennt og bætið út í pottinn. Látið suðuna koma upp og sjóðið í 15-20 mínútur á vægum hita, eða þar til baunirnar eru orðnar mjúkar, en ekki þannig að þær maukist. Bætið salti út í pottinn til þess að baunirnar haldi sig betur. Hellið vatninu af og látið baunirnar ná stofuhita.
Skerið snittubrauðið í mjóar sneiðar. Hellið ólífuolíu í skál og blandið brauðsneiðunum saman við olíuna. Raðið brauðinu á ofnplötu og bakið í ofni í 10 mínútur eða þar til brauðið er orðið ljósbrúnt. Látið brauðið kólna aðeins.
Blandið saman geitaostinum og mjólkinni í skál. Mjólkin á eingöngu að þynna ostinn þannig að gott sé að smyrja hann, um 2 tsk. Hrærið vel. Bætið dillinu út í og hrærið vel.
Áður en snitturnar eru búnar til er mikilvægt að allt sé við stofuhita. Smyrjið þá geitaostsblöndunni á hverja snittu, stráið örlitlu maldonsalti yfir og bætið svo góðri skeið af baunum ofan á. Einnig er hægt að hafa baunirnar og geitaostsblönduna í tveimur skálum á borði þannig að fólk geti fengið sér eftir hentisemi.
Filed under: Baunir, Beluga baunir, hvítlaukur, Smáréttir, svartar beluga baunir/svartar linsubaunir, Uppskriftir, Baunir, dill, geitaostur, prótínríkt, tapas, trefjaríkt, urad dal
