Þessa dagana virðist fólk vera með algjört æði fyrir bæði engifersafa og gojisafa. Það er að sjálfsögðu mjög gott mál og þess vegna ákvað ég að setja inn uppskriftina að þeim safa sem drukkinn er á þessu heimili. En fyrst smá um krabbameinshamlandi áhrif engifers.
Engifer inniheldur virka efnið gingerol sem er bólguhamlandi og andoxandi. Ég hef lengi ætlað mér að skrifa smá færslu um andoxunarefni og hvað í raun felst í orðinu andoxun. Til að skýra það í stuttu máli er andoxunarefni efni sem gerir sindurefni stöðug (e. free radicals) með því að veita þeim þær aukarafeindir sem á vantar til að fylla ysta hvel þeirra. Áhrif sindurefna hafa verið tengd við fjölmarga sjúkdóma, s.s. krabbameins, sykursýki, hjartasjúkdóma og Parkinsons sjúkdóm. Andoxunarefni geta þannig komið í veg fyrir skemmdir á frumum og stökkbreytingar á DNA vegna sindurefna, sem getur verið upphafið að krabbameinsmyndun. Ýmis efni teljast andoxunarefni s.s. C-vítamín, A-vítamín og E-vítamín og er því auðvelt að finna fæðu sem er rík af andoxunarefnum.
Rannsóknir benda til þess að neysla engifers geti haft hamlandi áhrif á myndun krabbameins og þá sér í lagi í maga og ristli (sjá t.d. þessa grein). Mér hefur þótt mjög gott að byrja daginn á litlu glasi af þessum safa, ef til vill með safa úr hálfri límónu. Hann er líka mjög góður, ef ekki betri, heitur beint úr pottinum, sérstaklega á köldum vetrardögum.
Uppskriftin inniheldur eftirfarandi krabbameinshamlandi fæðutegundir:
Ávextir: goji ber
Krydd: engifer, cayenne pipar
Uppskrift
gerir um 1,5 lítra
2 lítrar vatn
Ferskt engifer (12-15 cm) afhýtt og skorið i bita
4 msk. goji ber
1/4 tsk. cayenne pipar (má sleppa)
1-2 tsk. agave síróp eða eftir smekk
Setjið allt saman í pott og látið suðuna koma upp. Sjóðið við vægan hita í 45 mínútur. Slökkvið þá undir og látið standa í pottinum áfram í nokkrar klst. Hellið þá í blender og blandið saman. Sigtið því næst hratið frá og hellið í könnu. Drekkist heitt eða kalt.
Filed under: Drykkir, engifer, goji ber, A-vítamín, Andoxunarefni, bólguhamlandi, C-vítamín, E-vítamín, engifer, Goji ber, hjartasjúkdómar, magakrabbamein, parkinsons sjúkdómur, ristilkrabbamein, Sindurefni, sykursýki
